ಕತ್ತಲ ಕನವರಿಕೆಗಳು

ಗೀಚಿದ್ದು

ಆ ರಾತ್ರಿ ಹೇಗೆ ಕಳೆಯಿತೋ
ಒಮ್ಮೊಮ್ಮೆ ಅನಿಸುತ್ತದೆ ಆ
ತಂಗಾಳಿಯ ನಿಶ್ಯಬ್ಧ ಮೌನದ
ಹಿಂದೆ ಅದೇನು ನೋವು
ಅಡಗಿದೆಯೋ ಎಂದೆಲ್ಲ..

ಪಾವನವಾಗುವುದು ಮೈಮನವೆಲ್ಲ
ನಿಗೂಢ ರಾತ್ರಿಗಳಲ್ಲಿ ನಾಲ್ಕು ಗೋಡೆಗಳ
ಬೆಚ್ಚನೆ ಸೂರಿನಡಿ ಮಲಗುವ‌ ಮುನ್ನ
ತಾರಸಿಯ ಹತ್ತಿ ಒಬ್ಬನೇ ಸುತ್ತಲೂ
ನೋಡುತ್ತ‌ ಸುಮ್ಮನೆ ಕುಳಿತಿರುವುದೆಂದರೆ..

ಹಾಗೇ ಒಬ್ಬೊಬ್ಬನೇ ಹಲುಬುವ
ಹುಮ್ಮಸ್ಸು.. ಅದಾವ ಕವಿ ಬರೆದ
ಪದ್ಯಗಳು ಉಸಿರೊಂದಿಗೆ ಬೆರೆತು
ಅರ್ದಂಬರ್ದ ಹೊರಬಂದು ಬಿಡುವವು..
ಅಷ್ಟಕ್ಕಷ್ಟೇ ಮತ್ತೆ ಅದೇ ಕನಸುಗಳ
ಹಾವಳಿ ಶುರುವಾಗುವವು..

ಕೆನ್ನೆ ಸವರುವ ಬೆಳದಿಂಗಳು
ಎದೆ ನಡುಗಿಸುವ ಚಳಿಗಾಳಿ
ಮುತ್ತಿಡುವ ಚಂದ್ರಮನ
ಕಿರುನೋಟ...
ಸುತ್ತ ಒಂದೊಂದೆ ಮಾಯವಾಗುತ್ತ
ನಂದಿಹೋಗುವ‌ ದೀಪಗಳು
ಹೊಸ ಬೆಳಗಿಗೆ ಆದರಿಸಲು
ನಿದ್ರೆಗೆ ಸ್ವಾಗತಿಸುವ ಕಣ್ರೆಪ್ಪೆಗಳು...