ಕತ್ತಲ ಕನವರಿಕೆಗಳು

ಗೀಚಿದ್ದು

ಆ ರಾತ್ರಿ ಹೇಗೆ ಕಳೆಯಿತೋ
ಒಮ್ಮೊಮ್ಮೆ ಅನಿಸುತ್ತದೆ ಆ
ತಂಗಾಳಿಯ ನಿಶ್ಯಬ್ಧ ಮೌನದ
ಹಿಂದೆ ಅದೇನು ನೋವು
ಅಡಗಿದೆಯೋ ಎಂದೆಲ್ಲ..

ಪಾವನವಾಗುವುದು ಮೈಮನವೆಲ್ಲ
ನಿಗೂಢ ರಾತ್ರಿಗಳಲ್ಲಿ ನಾಲ್ಕು ಗೋಡೆಗಳ
ಬೆಚ್ಚನೆ ಸೂರಿನಡಿ ಮಲಗುವ‌ ಮುನ್ನ
ತಾರಸಿಯ ಹತ್ತಿ ಒಬ್ಬನೇ ಸುತ್ತಲೂ
ನೋಡುತ್ತ‌ ಸುಮ್ಮನೆ ಕುಳಿತಿರುವುದೆಂದರೆ..

ಹಾಗೇ ಒಬ್ಬೊಬ್ಬನೇ ಹಲುಬುವ
ಹುಮ್ಮಸ್ಸು.. ಅದಾವ ಕವಿ ಬರೆದ
ಪದ್ಯಗಳು ಉಸಿರೊಂದಿಗೆ ಬೆರೆತು
ಅರ್ದಂಬರ್ದ ಹೊರಬಂದು ಬಿಡುವವು..
ಅಷ್ಟಕ್ಕಷ್ಟೇ ಮತ್ತೆ ಅದೇ ಕನಸುಗಳ
ಹಾವಳಿ ಶುರುವಾಗುವವು..

ಕೆನ್ನೆ ಸವರುವ ಬೆಳದಿಂಗಳು
ಎದೆ ನಡುಗಿಸುವ ಚಳಿಗಾಳಿ
ಮುತ್ತಿಡುವ ಚಂದ್ರಮನ
ಕಿರುನೋಟ...
ಸುತ್ತ ಒಂದೊಂದೆ ಮಾಯವಾಗುತ್ತ
ನಂದಿಹೋಗುವ‌ ದೀಪಗಳು
ಹೊಸ ಬೆಳಗಿಗೆ ಆದರಿಸಲು
ನಿದ್ರೆಗೆ ಸ್ವಾಗತಿಸುವ ಕಣ್ರೆಪ್ಪೆಗಳು...

ನಮ್ದೂ ಒಂದ್ ಲೈಫು

ಅಡ್ನಾಡಿ ಮನ್ಸು ಅಡ್ಡಡ್ಡ ಯೋಚ್ನೆ
ದಿನಕ್ಕೊಂದ್ ಕನ್ಸು ವಾರಕ್ಕೆರ್ಡ್ ಕೆಲ್ಸ
ಹೆದ್ರೊ ಮನ್ಷ ಇದ್ ಬದ್ ಹಾದಿಲೆಲ್ಲ
ಕದ್ ಕದ್ ಓಡ್ಸು ವಯ್ಸು
ಗಾಳಿ ಬಂದ್ಕಡೆ  ತೂರ್ಕೋ ಅನ್ನು ಬಿಕ್ನಾಸಿ ಐಡಿಯಾಗಳು
ಎಡ್ವ್ದಾಗ್ಲೇ ಬುದ್ಧಿ ಅನ್ನೋ ಜಾಯಮಾನ

ಸಿಟ್ ಬರ್ದೇ ವಂದೆರಡ್ ವರ್ಷ
ಪೀಸ್ ಅಂದ್ರೆ ಕಾಸ್ ಇಲ್ಲ
ಕೆಳ್ಗೆ ಮ್ಯಾಲೆ ಎಲ್ಲಾ ನಮ್ಮವ್ರೆ
ಇದ್ದಲ್ಲೆ ಖುಷಿಯಾಗಿರು
ಬಡ್ವಾ ನೀ ಮಡ್ಗ್ದಂಗಿರು ಅನ್ನೋದು
ಮನಿದೇವ್ರ ಗಾದೆ
ಹಿಂಗಿಂಗೆ ಜೀವ್ನ ರತ್ನನ್ ಪದ್ಗಳೇ ಬಾಯ್ಪಾಠ

ಕೇಳಕ್ ನಾವು ಹೇಳಕ್ ನೀವು
ಮದ್ಯದಲ್ ಒಂದೆರ್ಡು ಬ್ರೇಕು
ತಿಂಗ್ಳಿಗೊಂದ್ ರೋಲು 'ಮಾಡೆಲ್ಲು'
ಸೀರಿಯಲ್ಲು ನೋಡಲ್ಲ ಸೀರೀಸು ಬಿಡದಿಲ್ಲ
ಬಾಡಿಗೆ ಕಟ್ಟೋಕ್ ಕಾಸಿಲ್ಲ ಮೂವಿಗ್ ಮಾತ್ರ ಲೇಟಿಲ್ಲ
ಚೂರ್ ಹೆಚ್ಚು ಚೂರ್ ಕಮ್ಮಿ
ಕಮಿಟ್ಮೆಂಟ್ ಇಲ್ದಿರೋ ಜೀವ್ನಕ್ಕೆ
ಅಡ್ಜಸ್ಟ್ಮೆಂಟ್ ಅಲ್ಲೇ  ಬದ್ಕು ಅನ್ನೋ ಪಾಲಿಸಿ... 

ಸೂರ್ಯನಿಗೆ ಸೂತಕ

 ಗೀಚಿದ್ದು

ಇಂಚಿಂಚು ಸರಿಯುತ್ತ
ಹೊತ್ತು ಕಳೆಯುವಾಗ ಕತ್ತಲಂತೆ
ಕರಿಮುಗಿಲು ಕಾಲವಂತೆ
ಮುಖದ ಮೊಡವೆಯ ಕೆಂಪು
ಬಾನ ರಂಗೇರಿದಾಗ
ಸೂರ್ಯನಿಗೆ ಸೂತಕವಂತೆ

ಚಕ್ರ ಉರುಳುತ್ತಲೇ ಇದೆ
ತಾನಲ್ಲದ ತಾನೆಂಬಂತೆ
ಬದುಕು,ಜೀವ,ಕಡಲ ಒಡಲೊಳಗೆ
ಕಳೆದು ಹೋದಂತೆ, ಬೀದಿ ಬದಿಯ ದೀಪ
ರಸ್ತೆಗಳ ರಂಗೇರಿಸಿದಾಗ
ಸೂರ್ಯನಿಗೆ ಸೂತಕವಂತೆ

ನಿಂತ ಚಕ್ರ ನಿಂತಲ್ಲಿ ನಿಂತಿದೆ
ಹಳೆಯ ಮಾಮರಕೆ ಹೊಸ ಕೋಗಿಲೆಯ
ಸ್ಪರ್ಶವನರಸುತ್ತಲೇ
ಚೈತ್ರಕ್ಕೆ ಕಾಯುವ ಕೆಲಸ
ಮಳೆಮೋಡದ ಹಾಯುವಿಕೆಗೆ ಇಳೆಯರಿಸಿದ ಹಾಗೆ
ಬೆಳದಿಂಗಳು ಇನ್ನೇನು ಬರಬಹುದು
ವಾರ್ತೆಯನು ಹೊತ್ತು ಸೂರ್ಯನಿಗೆ ಸೂತಕವಂತೆ

ಚಿರವಿರಹಿಯ ಬರಹ

ತೋಚಿದ್ದ ಗೀಚಿದ್ದು

ನಾಲಿಗೆಯೂ ಎಡವಿತ್ತು
ಮೂಕವೇದನೆಯ ತಾಪಕ್ಕೆ
ಅರೆಬೆಂದ ಹೃದಯಗಳ ಸಾಮಿಪ್ಯದಿ
ಸೃಷ್ಟಿಯ ಹಿತ್ತಲಿನಲ್ಲಿ ಹುಟ್ಟಿದ
ವಿಸ್ಮಯಗಳ ಪೋಣಿಸುತ್ತ

ಕಪ್ಪುಹಲಗೆಯಲಿ ಕರ್ಕಶ ದನಿ ಮಾಡಿದ
ಕಡುಗಳೇ ಸಹಪಾಠಿಯ ನಿದ್ರೆಗೆಡಿಸಿದ್ದು
ನಿನ್ನೆಗಳಲಿ ಜನಿಸಿದ ನ್ಯೂಟನ್ನನ ಗುರುತ್ವಕ್ಕೂ
ನಿನ್ನಗುವಿನಿಂದ ಒಂದಿಂಚು ಹಿಂದೆಯೇ ತಳಸ್ಪರ್ಷಿಸುವ ಕಳ್ಳನೋಟಗಳಿಗೂ ಸಂಪರ್ಕ ಕಲ್ಪಿಸುವ ಕಳಪೆ ಕಾಮಗಾರಿಯ ಸೇತುವೆಯೇ ಕೊನೆಗೊಮ್ಮೆ
ತೀಕ್ಷ್ಣ ಜವಾಬ್ದಾರಿಯ
ಯಜಮಾನಿಕೆ ಹೊತ್ತಿದ್ದವು .

ಪಿತ್ರಾರ್ಜಿತವಾಗಿ ಬಂದಿದ್ದ ಲೆಕ್ಕದ ಪಟ್ಟಿಯ
ಉಳಿದ ಕೊನೆಯ ಎರಡು ಹಾಳೆಗಳು ಮಾತ್ರ
ಆಕಸ್ಮಿಕವಾಗಿ ಹೇಳುತ್ತಿತ್ತು ನನ್ನಜ್ಜನ ಯೌವನದ
ಕಿತಾಪತಿಗಳ ಒಂದೊಂದಾಗಿ ಮೊನ್ನೆ ಹೊಲಿಸಿದ ನೀಲಿ
ಜುಬ್ಬದ ಮೇಲಿನ ಕಸೂತಿಯಂತೆ

ಬಿರುಮಳೆಗೆ ಇನ್ನೇನು ಕುಸಿಯುವ ಹಂತ
ತಲುಪಿದ್ದ ಗೋಡೆಗಳು ಕಾಲವನೆಣಿಸುತ್ತಲೇ
ಹನಿಗಳನು ಕುಡಿಯುತ್ತಿತ್ತು
ಮನೆಯೊಡೆಯುವುದರೊಳಗೆ ಮೊನ್ನೆ ತಾನೆ ಮಿಂದ
ಮಗಳ ಕಳಿಸಿಕೊಟ್ಟೇನೆಂದು.

ತೈಲವೆರೆಯುವ ಕೈಯ ಕಾಣದೆ
ವಾರಗಳೇ ಕಳೆದಂತಾದಾಗ
ಹೆಬ್ಬಾಗಿಲ ಬುಡದಲ್ಲಿನ
ಕಿರುಹಣತೆ ಕಪ್ಪು ಕಾಣುತ್ತಿತ್ತು..
ಹದಿನಾಲ್ಕರ ಬಾಲೆಗೆ ಮುತ್ತೈದೆಯ ಕನಸು
ಬೀಳಲಾರಂಭಿಸಿತ್ತು..!!